بعد تفكير عميق يا جماعة فى اللى احنا فيه دا
الناس اللى كانت بتشارك انشغلت شوية و دخولها المنتدى قل .. نسبة تسجيل اعضاء جداد فى المنتدى قلت دا بجانب قلة معدل المشاركات برضه
قعدت اسأل نفسى شوية اسئلة .. يا ريت الناس اللى تقرا الموضوع تفكر فى الاسئلة دى و تجاوبها من خلال وجهة نظرهم
> المنتدى دا ايه لزمته؟
إجابتى >> احنا شايفين واقع مش راضيين عن حاجات كتير فيه .. و احنا بنعانى مشاكل كتيرة قوى فى مجتمعنا و وطننا فاحنا عايزين نحسن الاحوال دى و نرتقى بافكارنا شوية عن كدا
و دا يخلينا نراعى ان مواضيعنا ماتكُنش مجرد مواضيع زى الموجودة فى باقى المنتديات
> الأسرة اللى عايزين نكوّنها ، ماذا عنها؟!!
إجابتى >> احنا عايزين ناس محترمة و مثقفة نبنى بيها أسرة تعمل على الارتقاء
و هنا فى الحقيقة انا بتبسط شوية من اللى حاصل .. الناس اللى بتشارك رغم انهم قليلين إلا انهم كلهم و الحمد لله ناس راقيين و مثقفين و محترمين .. لكن كان فيه ناس من اللى مش بيشاركوا دلوقت لو كانوا شاركوا ماكانوش هيسيبوا الانسجام دا حاصل و كانوا هيوجدوا المشاكل باستمرار
> اللى ظروفه حايشاه مانعذروش؟
عيب .. مايصحش .. الناس اللى معوّدينا ع المشاركة و متغيبين اليومين دول لظروف على عيننا و على راسنا .. لا يكلّف الله نفسًا إلا وسعها .. بندعى لهم من كل قلبنا و ربنا ان شاء الله يعدّى الظروف اللى همّ فيها دى على خير
> اللى زهق من المنتدى او مش متفق معانا ندبحه؟
لا طبعًا لكل انسان وجهة نظره الخاصة بيه و اللى الناس لازم تحترمها .. و اللى يكون مش مقتنع و بالتالى مش بيشارك دا احسن من اللى بيشارك و هو مش مقتنع
و انا فعلا بحترم من كل قلبى اللى مش بيشارك معانا عشان مش مقتنع او مالوش مزاج .. و له الحق فى ذلك و ليس لنا أن نسأم منه
أخيرًا بقى وصلت إلى حاجة كدا جت فى دماغى مش عارف هتوافقونى فيها ولا لا
منتدانا غرضه الارتقاء و التحسين و بما ان العمل بالفكرة دى تقيل على قلوب ناس كتيرة فمش هنبقى مليون فى خلال يوم و ليلة
فافتكرت حاجة اسمها (مبدأ الخميرة) كما أسماها معلمى ( ص. ح. ) المبدأ دا معناه ان الناس الحلوين هيتقابلوا و عددهم يزداد بأسلوب الخميرة .. يعنى بمرور الوقت حلقة الناس الكويسين هتوسع اكتر و اكتر و اكتر
و بكدا فالمنتدى هيفضل مفتوح و شغال حتى لو فضلنا ع الحال دا سنين انا عن نفسى مش هيأس تانى و مش هتوقف عن المشاركة و المنتدى هيبقى بمثابة مكان يرحب بأى شخصية محترمة حابة تنضم لأسرتنا
و انا عن نفسى لو قابلنى شخص ارضى بانه يكون اخ لينا هدّى له عنوان بيتنا (منتدانا) على طول و لانه لما يدخل مش هيلاقى غير ناس محترمين ، هيشترك و هيشارك توماتيكى توماتيكى
فى كتاباتى (انا عن نفسى) هركز على اننا اسرة عايزين نتكلم و نتناقش سوا فى قضايا كتيــــــــر
التكالب على الرفع و التحميل للأفلام و المسلسلات اللى حاصل فى باقى المنتديات دا .. انا مش ههتم بيه أد ما ههتم باننا اسرة واحدة .. اى نعم عددنا لسا قليل لكن ان شاء الله هيزيد
طولت عليكم و صدعتكم بس ماعلش انا عارف انكم هتعذرونى و تسامحونى
فى انتظار ردودكم اللى فيها هتقولوا رأيكم فى كلامى من غير مجاملة
موضوع: (قرار) هام للجميــع أعضاء و زوار فبرجاء المرور 
الأحد 31 أغسطس 2008, 1:10 am
