عملت ايه؟......وهتعمل ايه؟

كلنا عارفين ان بلدنا فيها شئ من التخلف
وفيه بلاد اخرى كتيييييير اوى متقدمة عنها بأميال
وكلنا بنقول الكلام ده وبنتكلم عن المساوئ وبننقدها دايما
لكن فيه منا اللى بينقد نقد هدام وللأسف هم اغلبية
وعدد بسيط جدا بينقد ولكن نقد بناء

لو سألنا كل واحد بينقد البلد دى وحكومتها ومشاكلها ومهتم بذكر كل ما هو سئ فيها
عملت ايه؟؟؟
كلنا عرفنا خلاص من زمن انها مش كويسة انت بقى عملت ايه جديد؟؟؟

المشكلة اننا كلنا نفسنا ننام ونصحى بكرة نلاقى البلد كويسة لوحدها
او بالكتير اووووووى نستنى 10 سنين مثلا ونلاقيها اتغيرت فجأة وبقت احسن من دول اوربا و امريكا وبتنافسهم
كل واحد يفكر يعمل حاجة بسيطة يبقى مستنى يشوف نتيجتها كبيرة اوى وفى اقصر وقت ممكن

اكيد كلامى رخم ومستفز واتسمع كتير اوووووى قبل كدة
بس بجد لو رجعنا للماضى والتاريخ شوية
....او كتير
لما نوصل للقرن التاسع الميلادى
هنلاقى ان فى الوقت ده او يمكن قبلها العرب والمسلمين - ومش هقول عليهم احنا لأننا غيرهم - كانوا اقوى ناس فى العالم كله
وكانوا اقوياء بعلمهم وثقافتهم وحضارتهم
ولأن القوى دايما بيكون قدوة لغيره والكل بيحاول يقلده فى كل حاجة
زى ما دلوقتى احنا بنحاول نقلد الغرب دايما
المسلمين كمان اتقلدوا فى يوم من الأيام
لدرجة ان العمامة كانت فى فترة موضة
الغرب بيلبسوا عمامة كموضة ويتشبهوا بالعرب والمسلمين
سبحان مغير الأحوال!!

وكانت بتتم حركات ترجمة لأى كتاب عربى الى اللغة اللاتينية على يد عدد كبير من المترجمين
والكتب والعلوم دى ظلت تدرس فى جامعات اوربا حتى منتصف القرن السادس عشر على الأٌقل
لو اتحسبت هتكون اكثر من 600 او 700 سنة
دى دراسة فقط لكتب العلوم المختلفة
وبعد الفترة دى بدأ الابتكار والتطبيق لكل ما تمت دراسته

فى الفترة دى طبعا العرب اتعرضوا لهجوم وغزو كبير من دول اخرى وكل المكتبات اتدمرت والعلماء خرجوا من بلادهم والكتب المهمة ارسلت لدول تانية لتدرس فيها
العرب كدة بيموتوا فى نفس الوقت اللى غيرهم فيه بيصحى
بس الفترة اللى صحيوا فيها كام سنة؟؟؟
طبعا انا بقول كلام غريب
يعنى احنا كدة محتاجين 600 سنة على ما نتعلم ونرجع تانى؟؟؟
الله اعلم كم سنة
بس عمرها ما هتحصل لوحدها
المهم ازاى نبدأ

ولو رجعت سألت تانى انت عملت ايه للبلد؟؟؟؟؟
لو سألت حد هيضحك عليا
ولما حد يقوله ابدأ بنفسك
يقول هبقى لوحدى ولو انا عملت حاجة اللى انا عملته هيفيد بايه؟؟؟؟
والله هيفيد
طيب الغرب زمان قلدونا لحد ما وصلوا
مش عيب ان احنا كمان نقلد لحد ما نوصل للابتكار

مثلا
لو بصينا للبداية عند الأطفال
فى الغرب فيه تيرم كامل او سنة دراسية للأطفال قبل دخول المدرسة
السنة دى اسمها "You can do that"
كل اللى بيتعلموه فى السنة دى انهم يقدروا يعملوا حاجة
ازاى ياخدوا قرار وينفذوه
وازاى يكون قدامهم هدف ويوصلوا ويحققوه بأى طريقة
عندنا احنا لو كلمت أى طفل عن حاجة
يقولك ده لسة صغير هو ده هيفهم حاجة؟؟!!
طب ليه اللى هناك بيفهم؟

طب فى الوقت اللى فيه "الميس او المستر" بتوع الأطفال فى K.G.2
بيوقفوهم ويرفعوا ايديهم لفوق علشان كانوا بيتكلموا
لو حاولوا يعلموهم ولو شئ بسيط عن الهدف والقرار
او يحسسوهم بالثقة فى نفسهم انهم يقدروا يعملوا حاجة
هتفرق ولا لأ؟؟؟

طب فيه كم أب وأم فى مصر فكروا يقروا كتب عن أساليب التربية السليمة علشان يقدروا يصنعوا طفل يقدر يفيد نفسه وبلده؟؟؟
كل واحد بيكسل يضيع 30 دقيقة كل يوم من وقته الثمين فى الكلام الفاضى ده طبعا
واللى يقولك ما احنا اهلنا عرفوا يربونا من غير الحاجات دى
طب وانت طلعت ايه وقدرت تعمل ايه بالتربية دى؟؟؟

قيس على كدة كل وظيفة او كل مهنة
هنوصل فى الآخر ان كل واحد هيعمل حاجة ولو بسيطة هتكون مفيدة ولها أثر ولو كان مش كبير بس مفيد
المدرس لو غرس فى 50 طفل من اللى بيعملهم قيم سليمة وحاول يراعى ضميره ويعلمهم يكون عندهم ضمير وعندهم هدف وامل
ولو كل واحد من ال 50 طفل لما اتربى وكبر على القيم دى ونفذها وعمل بيها فى شغله وعلم الكلام ده ل 50 واحد من بعده
وهكذا....

ومش لازم يكون مدرس بس
أى حد بيشوف واحد عنده ضمير فى زماننا ده الواحد ده بيشجعه انه يكون كويس وزيه
لأنه بيحس انه مش لوحده
بيحس ان الدنيا لسة بخير
لو كل واحد فكر انه يعمل حاجة مش كبيرة
مجرد انه يؤدى عمله بضمير ويتقى ربه فى عمله
بجد فيه حاجة هتتغير

انا رغيت كتير اوووى بس بجد ارتحت
دلوقتى بقى يا ريت كل واحد يقولنا فكرة ايجابية
تكون حصلت فعلا او نفسه انها تحصل
او حاجة ايجابية هو عملها
بحيث كلنا نشجع بعض ونكون احنا ولو كان عددنا صغير اوى نؤدى رسالتنا ودورنا
ولو فيه حاجة نقدر نتفق ونعملها يا ريت
بجد هيكون شئ جميل اوى

ولو انا رغيت على الفاضى يا ريت حد يقولى برده
آسفة جداااااا على الاطالة
السلام عليكم

بجد يا سروئة مش لاقى كلام اقوله بعد كلامك
انا بعد ما قريت الموضوع قعدت اكتر من ساعة الا ربع مابعملش حاجة غير انى سرحان فى كلامك و مركز فيه
بجد حالنا بقى يحزن
و سبحان الله كلامك دا انتى كتبتيه فى وقت انا كنت فيه بتألم لنفس القضية
تخيّلوا لما يكون واحد دبلوم تجارة و مش عارف ايه هى الكرة الأرضية و يسأل سؤال برئ .. فين الكورة الأرضية اللى بيقولوا عليها دى؟
و نفس الشخص بعد ما سمع كلمتين من الداعية عمرو خالد بيحكى بقى و يقول مصر دى أصلا أرض اليهود ..
المفاجأة الفادحة أنّ هذا الشخص من مواليد 1986 م
حاجة تشرح القلب ، مش كدا؟
الكلام دا حصل النهارده ما بين العصر و المغرب فى الكوافير (صالون الحلاقة) على فكرة
ماكنتش عارف اضحك ولا ابكى و انا ف الموقف دا
لو هضحك اضحك ليه؟ .. و لو هبكى ابكى لمين؟
دا ذنبه هو؟
ولا ذنب الوزارة اللى ادّت له (دبلوم تجارة) ، و هو بعد كل العلوم و الدراسات الاجتماعية (بما فيها من جغرافيا) اللى درسها فى إعدادى لا يفقه شئ عن مصطلح اسمه الكرة الأرضية ، و بيقول ان مصر بلد اليهود !!
ولا ذنبى انا؟ انى شفت حاجة زى كدا و مارحتش ع الوزارة افضفض لها و رجعت على بيتنا و رقدت على سريرنا و قعدت على سفرتنا و اكلت عادى !
و قلت فى سرى .. طاب ازاى يا باش مهندس فيه ناس كدا (بالشهادااات دى و المستوى الثقافى دا) و انت بتقول نفسك البلد تتقدم و نبطّل نشر غسيل مش معصور و نبطّل زق فى طوابير العيش ؟
بجد خفت اكون يأست من التغيير
بس حقيقى المعادلة صعبة ، مش كدا و بس .. المعادلة تزداد صعوبة كلما مر الوقت !
و لذا فلا بد من وقفة ..
و لكن ممن هذه الوقفة تكون؟
من الوزارة اللى بتدّى دبلوم تجارة لواحد مش عارف الكرة الأرضية يعنى ايه ؟
من الشباب اللى زى الفل اللى اكتر من 50% منهم زى أخينا المذكور كلامه فى حديثى دا ؟
من الوالد اللى بيشتغل شغلانتين و ما بيصدق يرجع البيت ياكل لقمة و يشرب كوباية شاى و يدخل ينام ؟
ولا من ستات البيوت اللى بتنشر الغسيل من غير ما تعصره ؟
المشكلة ان فيه لعبة اتلعبت صح
كلامك يا سروئة صح و مظبوط
لكن فيه زاوية مش مكتملة الرؤية
فى الوقت اللى الغرب اخدوا علومنا و درسوها
الموضوع مامثلهمش انهم عايزين يكونوا زينا
هم كانوا عايزين يكونوا فى مكانتنا بحيث يكونوا المميزين بانهم يسبقونا مش مجرد يلحقوا بينا
فوجهّوا الكثير من الأسلحة تجاهنا و من أبرزها الاحتلال و الحروب
احنا ساعدناهم و خلينا هدفهم مش مجرد انهم يكونوا مميزين ، بل انهم يكونوا الوحيدين
و هكذا صار الوضع
فى الوقت اللى فيه ، فى الغرب ، (جون) بيدرب ابنه (كيفن) ياخد قرار و هو عنده 6 سنين او اقل ..
بقى ، فى وطننا الحبيب ، (س) اللى من مواليد 1986 و معاه دبلوم تجارة ، بيسأل يا جماعة ماحدش سمع حاجة عن اللى بيقولوا عنها كرة أرضية دى ؟
أذكر قول الله عز و جل "إنّ الله مع الصابرين" ..
بس صبرنا مش المفروض يكون اننا نحط إيدينا على خدنا و نستنى الفرج
او حتى اننا نركز فى دراستنا و السلام
الموضوع مابقاش يحله عالم نابغة هيطلع
لالالا .. الموضوع فعلا تضخم و بقى اكبر من كدا بكتيــــر
احنا بجد لازم نعمل حاجة
اوعدكم كلكم و اوعد شعبى واحد واحد (و اولهم اللى كان بيسأل عن الكرة الأرضية و معاه دبلوم تجارة) انى مش هتوقف عن التفكير فى (احنا ممكن نعمل ايه؟) و بجد كل شئ هيخطر على ذهنى هقولهولكم فور تدوينه بشكلٍ يصلح للعرض
آسف أشد الأسف على الإطالة
كالعادة اشكرك سروئة ، و بجد سعيد جدًا انى اعرف حد زيك كدا

saro2a كتب:: المدرس لو غرس فى 50 طفل من اللى بيعملهم قيم سليمة وحاول يراعى ضميره ويعلمهم يكون عندهم ضمير وعندهم هدف وامل

انتى بتتكلمى عن اية يا اسراء
بتتكلمى عن المدرس تفتكرى المدرس دلوقتى يعرف يغرس زى ما بتقولى قيم سليمة
انتى مفكرة ان المدرس دلوقتى بيربى تلاميذة على الاخلاق والمبادئ والقيم
يبقى انتى اكيد مش عايشة فى الدنيا

المدرس دلوقتى وظيفتة القتل
اكتر من كدا ما بيعرفش يعمل حاجة

الا من رحم ربة اكيد

بس هقولك ان اكيد البلد فيها خير كتير بس احنا مش شايفنة ومش عارفين نقدرة
تقدرلى تقوليلة العلماء بتوعنا فين دلوقتى ؟؟؟؟؟
كلهم فى الخارج ولية ؟ عشان مش لقين نفسهم هنا ولية ؟؟؟
عشان احنا من عاريفين قيمتهم شاطرين بس ساعة ما يخدوا جوائز
يبقى اةةةةةةةةة دا ابن النيل وابن مصر غير كدا ما يعرفهوش

انا تصفحت على النت ولقيت ان فى طفل عنده 10 سنين بقى اكبر مبرمج معتمد من شركة ميكروسوفت فى امريكا
دا نبغة من مصر وعمل اختبار ذكاء جاب درجة تفوق العالم احمد زويل ب10 درجات
تقدرى تقوليلى مصر هتعملة اية ؟

ولا حاجــــــــــــــــــــــــــــــــــــــــــــــــة

شكرا يا saro2a على الموضوع الاكثر من رائع

وانت دايما متميزة

بصراحة انا مش عارف ارد اقول ايه يا saro2a

انا حاسس ان انا مش بإيدي حاجة اعملها لوحدي

لكن لو لاقيت حاجة تشجعني أكيد هبقى معاها

الباش مهندس

اشكرك جدااااااا على كلامك ده

انا عاجزة عن الرد او التعليق على كلامك

بس هحاول

بجد معاك حق

بس على فكرة الذنب مش ذنب واحد لوحده

الذنب ذنب الكل

لأن لو كل واحد كان قام بدوره من الأول كامل وبدون تقصير

عمر ما كان الشخص ده هيكون كدة

وعمر ما كان هيبقى 50% من الشباب بحالهم ده

الباش مهندس كتب:: كلامك يا سروئة صح و مظبوط
لكن فيه زاوية مش مكتملة الرؤية
فى الوقت اللى الغرب اخدوا علومنا و درسوها
الموضوع مامثلهمش انهم عايزين يكونوا زينا
هم كانوا عايزين يكونوا فى مكانتنا بحيث يكونوا المميزين بانهم يسبقونا مش مجرد يلحقوا بينا
فوجهّوا الكثير من الأسلحة تجاهنا و من أبرزها الاحتلال و الحروب
احنا ساعدناهم و خلينا هدفهم مش مجرد انهم يكونوا مميزين ، بل انهم يكونوا الوحيدين
و هكذا صار الوضع

معاك حق

ربنا يعين القادرين على الاصلاح على اصلاح ما يمكن اصلاحه

وربنا يخليك يا باش مهندس على ردك

وانا اللى سعيدة بانى انضميت للمنتدى هنا

وعرفت ناس زيكم

nour

شكرا على ردك الجميل والواقعى
ومعاكى حق
انما مش علشان مدرس او اكتر حصل منهم جرائم كدة يبقى نعمم
زى ما بتقولى
البلد فيها خير كتير واحنا مش شايفين
بس الخير ده عمره ما هيخرج لوحده
كل واحد محتاج طاقة تخرج الخير اللى بداخله
والطاقة دى اكيد هى تشجيع الآخرين له
ولو كل واحد كسل يخرجه او يشجع غيره
يبقى عمر ما حد هيخرج طاقة الخير دى

nour كتب:: تقدرلى تقوليلة العلماء بتوعنا فين دلوقتى ؟؟؟؟؟
كلهم فى الخارج ولية ؟ عشان مش لقين نفسهم هنا ولية ؟؟؟
عشان احنا من عاريفين قيمتهم شاطرين بس ساعة ما يخدوا جوائز
يبقى اةةةةةةةةة دا ابن النيل وابن مصر غير كدا ما يعرفهوش

والأفظع من كدة
تقدرى تقوليلى اللى اتمسكوا ببلدهم حصلهم ايه؟؟؟
شوفى كام عالم مصرى اغتيل ومات شهيد
لأنه كان بيفكر فى بلده
بس لو طاقة حب البلد دى ظهرت على الكل الحال هيتغير باذن الله

وبالنسبة للطفل فعلا مصر ما فيش فيها امكانيات انها تحتضن الطفل ده
بس هنرجع نقول مين المسئول عن ان يكون فيها امكانيات؟؟؟؟
هو الطفل ده لما يكبر هيكون احد المسئولين

اشكرك يا نور على ردك الجميل
وربنا يخليكى ده من ذوقك
التميز للمنتدى مش ليا
السلام عليكم

hamada salah

شكرا على ردك
وفعلا احنا محتاجين تشجيع
لكن لو حد قدر يعمل حاجة لوحده اكيد دى لوحدها بتشجع غيره انه يعمل
ولو النية صادقة بجد
هنلاقى ان فيه قدامنا كتير نعمله واحنا مش واخدين بالنا
ولما افتكر حاجة نقدر نعملها هقول ان شاء الله
شكرا على مرورك